قصة البرازيلي سوزا في بورتو وليه لسه بره الصورة مع فاريولي؟

وي كورة : البرازيلي بدأ ياخد رجله واحدة في الكواليس، حتى إنه لعب مباراة تدريبية ضد أكاديميكا صباح الأحد لكن لحد دلوقتي المدرب فرانشيسكو فاريولي مش مستعجل يرميه في الفريق الأول مرة واحدة، والسبب واضح.. التأقلم مش سهل خالص،سوزا محتاج وقت أطول عشان يستوعب أفكار المدرب الإيطالي، واحنا دورنا ورا القصة.

فاريولي عايز حاجة تانية خالص

سوزا وصل بورتو وهو باك شمال هجومي بطبعه، بيحب يطير على الخط ويكمل لقدام إنما فاريولي بيطلب حاجات أكتر بكتير من الباكات بتوعه لما الكرة معاهم في بورتو، الباكات على طول بتدخل لقلب الملعب وقت التحضير، بتتمركز جنب لاعب الارتكاز ،ده بيخلي الأجنحة هي اللي تفتح الملعب على الآخر، وبيدي بورتو زيادة عددية في نص الملعب ومن هنا الباك لازم يبقى عارف إمتى يفضل جوه، إمتى يساعد في البناء، وإمتى يطلع يهاجم تاني،وكمان عليه مسؤولية كبيرة أول ما الكرة تضيع، لأن باكات بورتو جزء أساسي من الضغط العالي المنظم جدا اللي بيعمله الفريق.

ده كتير على سوزا إنه يستوعبه مرة واحدة، وده تغيير كبير عن كل اللي اتطلبه منه في مسيرته القصيرة لحد دلوقتي الدور المقلوب ده مكنش جزء من تكوينه في سانتوس، ولا كان موجود كتير في فتراته مع توتنهام تحت توماس فرانك أو إيجور تيودور أو روبيرتو دي زيربي.

فرانك وتيودور كانوا مباشرين أكتر والاستحواذ عندهم قليل، ودي زيربي بيحب التحكم في الكرة آه، بس بيطلب من الباكات تفتح عرض الملعب وتعمل أوفر لاب واندر لاب، مش تدخل لقلب الملعب بشكل دائم.

فيه مقارنة واحدة بس في توتنهام تمشي مع اللي بيحصل.. أنجي بوستيكوجلو،الأسترالي كان كتير بيدخل الباكين لجوه الملعب وقت الاستحواذ ويسيب الأجنحة فاتحة بره ودي شغلانة متعبة جدا لأن اللاعب فجأة بيستلم الكرة في أماكن ووضعيات جسم مختلفة تماما عن الباك التقليدي،وسوزا للأسف ملحقش يشتغل معاه.

بورتو مش مستعجلة عليه

وده ممكن يفسر ليه بورتو واخدة وقتها حتى مع إصابة زايدو وغيابه،فرانشيسكو مورا لسه خيار موجود، وفاريولي كمان مبسوط جدا وهو بيلعب بالباك اليمين الأصلي مارتيم فيرنانديز على الشمال ومارتيم متوقع يبدأ أساسي هناك ضد بنفيكا يوم الأحد، وهو كمان اللي لعب باك شمال ضد مانشستر سيتي في افتتاح دوري الأبطال لبورتو.

وبالنسبة لسوزا، دي أوضح إشارة لوضعه الحالي،بورتو مش شايفة إنه مش جاهز عشان ناقصه إمكانيات هجومية كباك شمال، هما بيحاولوا يعلموه نسخة مختلفة تماما للمركز ده بعد ما قعد فترة طويلة من غير لعب في توتنهام، راح البرتغال وهو بيدور على دقايق لعب،الدقايق دي لسه مجتش لحد دلوقتي، بس فترة التوقف الدولي الحالية فرصة ممتازة يقرب أكتر من اللي عايزه فاريولي.